ابي أشاركم قصه صارت معاي ودي افضفض اللي بخاطري في هذا البوست .. بحط اسماء وهميه للحفاظ على خصوصيه الناس ..
هي صارت في دوامي القديم واثرت عليه وايد لدرجه اني صرت كل يوم اتحسب ع المدير اللي ظلمني ويليت فتره مب قادره اتخطى اللي سواه .. مستحيل اسامحه ليوم الدين..
كنت اداوم في شركه شبه حكوميه من 2015 ف قسم العمليات .. شغلي كان كله يعتمد على شحنات السفن والباخرات .. الشغل ما يوقف عادي اطلع من المكتب الساعه ٤ بس ارد البيت وأكمل شغل الايميلات والمكالمات .. حتى ف الويكند او وانا ماخذه اجازه الشغل ما يوقف.. كنت احب شغلي وايد واسويه من قلبي وراتبي كان ممتاز .. كان عندي الباركن الخاص مالي ويدفعون عن مدارس عيالي ويدفعون عن بترول السياره و الاغلبيه كنا مواطنين ومواطنات ف القسم وشويه هنود معانا .. يعني الوظيفه المثاليه بالنسبه لي.. انا و بنات القسم كلنا كنا ربع ومتفاهمين وعلى قلب واحد ..
ف سنه 2022 تغير رئيس الاداره عندنا .. مدير القسم ترقى وصار رئيس اداره بنقول اسمه (حمد) .. فجاه بدا يطبق علينا قوانين من مخه .. ممنوع ناخذ بريك الريوق .. ممنوع ناخذ اجازه من دون موافقته .. ممنوع نرفض اي مهمه عمل حتى لو كانت غير مرتبطه بقسمنا .. ممنوع نتلكم مع بعض .. ممنوع ناخذ عمل عن بعد .. ممنوع نطلع اجتماعات خارج القسم .. كان مهووس يبا سيطره كامله ف القسم بطريقه تخنق ..
طلع موظف عندنا اجازه شهر كامل لانه بيعرس وسلموني شغله شهر وسويت شغلي وشغله بدون اي اخطاء او اي تاخير .. وبعده طلعت زميلتي اجازه وضع عطوني شغلها اسويه فوق شغلي وشغل المعرس وسويته .. وقت التقيم توقعت يعطوني تقييم ٤/٤ بس ما صار وعطوني ٣/٤ بحكم ان في ناس اداؤهم احس مني ف القسم ورضيت بس سالت (حمد) شو المطلوب مني عشان احصل تقييم ٤/٤ السنه اليايه قال شدي حيلج بدون اي تفاصيل ..
طلبت زياده راتب لان راتبي ما تغير من ٤ سنين .. حمد سوى لي طاف بعد ٦ شهور سالته مره ثانيه قال مديرج المباشر رافض يعطيج ما يشوفج كفو .. ما حسيت شي فايده اسال اكثر وسكت عن الموضوع .. بعد فتره يابوا موظفه يديده وطلبوا مني اعلمها الشغل كله علمتها كل شي .. وطلعت اجازه سبوعين و قالوا هيه راح تمسك شغلي ف اجازتي .. يوم رجعت من اجازتي طلبوا مني اسلمها شغلي كامل وكتبوا ايميل رسمي وما قدرت اعاند المدير و وافقت .. لان حزتها قال بنعطيج شغل اكبر ويمكن هالشي يساعدج تترقين ووافقت .. كملت شهرين ما عندي شغل اداوم واتم فاضيه ٨ ساعات وحسيت بالضياع .. وكل مره اكلم المدير عن المهام اليديده يقول اصبري ..
بعدين ردولي جزء من الشغل القديم بحجه ان البنت اليديده ما حبته .. صاروا ما يدخلوني ولا اجتماع ولا الايميلات توصلني .. لكن اي تقصير يصير ف الشغل كان يعتبر غلطه مني لدرجه اني اتحاسب على معلومه ما اعرفها ولا حد خبرني عنها بس فجاه اتهزأ من المدير لاني ما سويتها .. انا طبعا اكتب فيهم ايميل واشرح الوضع وابين لهم ان المعلومه وصلتني متاخر او ما وصلتني بالدليل ويردون عليه اني كسوله وغير كفؤ لقسم العمليات ..
بعد فتره زقرني حمد عنده وقال انا اعرف اعرف انج تحشين فيني وتدعين عليه لان ما ترقيتي .. انا توصلني اخبارج كلها طبعا نكرت كلامه لان ماصار بس هو تم يصرخ ويهددني ويخوفني ان مصيري ف ايده ومن هالكلام .. وقال ما ينفع ارقيج لانج ام ومعرسه وخا ينفع نكلمج بعد ساعات العمل .. صرت اخاف اتكلم مع اي حد ف القسم وشكيت ف كل البنات حولي لان صح كلامه كنت زعلانه اني ما ترقيت لكن مادري منو تبلى عليه اني ادعي عليه.. صابني احباط وصرت كئيبه من المعامله الخايسه ف القسم .. واي مشكله عندي ف الشغل او ف القسم اروح عند مديري او حمد اطلب مساعدته كان يقلب الموضوع ضدي اكثر ..
مره طرشت ايميل ل مديره الموارد البشريه اني ابي مساعدتها عشان اطور واترقى ويتعدل شغلي .. رفضت مقابلتي ورفضت اكلمها الا بموافقه حمد .. رحت كلمته وخبرته عشمني وقال بيكلم مديره الموارد البشريه بنفسه .. تريت ٦ شهور هي تقول حمد ما عطاني الموافقه وحمد يقول هي مب موافقه ترقيج ..
المهم سنه ٢٠٢٤ حملت وكنت اتعب وايد ف حملي .. ما كان فيني قوه اجادل حد يادوب اركز على صحتي .. صرت هاديه وساكته ف الدوام .. اشتغل واطلع ما يخصني ف حد .. ووقفت اشتغل ف الويكندز واذا مريضه ما اشتغل ف اجازتي المرضيه .. طبعا حمد ما عيبه الوضع وخلى بنات القسم كل يومين يخبروني انه مضايق مني ومش عاجبه وضعي ..
كان حمد يتصل ف زميلاتي يسالهم ليش ام غيث ما تسلم عليه وليش ما تمر عندي المكتب وليش ما تطلب مني مساعده .. المشكله كنت مستغربه مب فاهمه شو يبا مني .. لا هو مخلني اطور ف الشغل ولا هو مخليني ف حالي .. كان مبينه ومبيني ٢ مدرا مباشرين وفرق ٤ او ٥ درجات .. اذا في شي كنت اول اروح عند مديري المباشر( اشرف) واذ تطلب الوضع تدخل اداري كنت اروح عند حمد ..
بس حمد كان يستانس لان في بنات يمرون عليه المكتب طول اليوم ومكبرين راسه ويعطونه على جوه ويصبون له قهوه ويحشون عنده و انا ما كنت اشاركهم السوالف مابي اعق الميانه ويا الرياييل ..
بعد اجازه الوضع رجعت للدوام وكنت اكمل شغلي واطلع واخر الشهر اخذ راتبي وما يخصني ف حد ما اسولف الا ف اشيا تخص الشغل .. بدا مديري المباشر (اشرف) يتهمني بالإيميلات بأخطاء ما سويتها وكل شوي يوثق سالفه ضدي ف الايميلات كنت ارد عليه اوضح الموقف بس ماشي فايده .. مره عطوني انذار شفهي لغلطه اني نسيت احط فاصله ف السيستم بس ما صارت اي خساره ماليه وتداركنا الموضوع خلال ١٠ دقايق السالفه صارت شهر ٤ بس الانذار عطوني اياه فجاه بعد ٥ شهور .. مع ان قبل كان عندنا موظف خسر الشركه مليون درهم بس محد حاسبه وحتى يوم استقالته كرموه وودعوه احلى وداعيه .. بسسسس هني تاكدت انهم حطوني ف راسهم ويحاولن يطفشوني ..
مره طلعت اجازه سبوعين وشغلي كان يسويه مديري المباشر ( اشرف) .. اول يوم رديت من الاجازه وصلني ايميل تهزيئ من (اشرف) ان شغلي عالق ومتاخر والاقسام الثانيه متاثره وهالاستهتار غير مقبول ومسوي cc لكل المدرا الكبار .. جان اتصل به بالتفلون ابي افهم شو اللي صار ليش يطرش لي ايميل جذي وهو يعرف اني كنت ف اجازه وهو اللي كان ماسك شغلي ف اجازتي .. بدا يصرخ عليه ويهددني "انه يقدر يطلعني غلطانه جدام حمد على كيفه وانتي تعالي بالاثنين و شوفي شو بيصير فيج وانا براويج انتي اصلا مب كفؤ "وتم يصرخ عليه ورقع التلفون ف ويهي .. ما قدرت اتحمل قله الاحترام والظلم اللي صار يلست اصيح ورديت البيت قلبي مليان قهر .. اول شي انا ما غلطت وثاني شي هو هندي كيف يتجرا يصرخ عليه جذي وثالث شي كنت ف اجازه الشغل كان عنده كان المفروض هو يسويه .. ما تحملت اتصلت في المدير التنفيذي( حارب) اللي هو اكبر راس بالشركه وخبرته باللي صار قال ما يخصني انتي عليج شكاوي وايد ما قدر اساعدج هذي كانت اول صدمه يعني في حد كان يالس يشوه سمعتي من زمان ..
كتبت ايميل للموارد البشريه بالموضوع وطلبت اجتماع و تحقيق ردت عليه قالت اول شي روحي عند رئيس الاداره حمد واذا ماحلو مشكلتج تردين عندنا .. هذي كانت ثاني صدمه لان قانون الشركه واضح التهديد و قله الاحترام فيها فصل من الشركه .. وهم ماخذين الموضوع لعبه..
رحت عند مدير مديري ( عمر ) رد عليه ان الموضوع بسيط وسوء تفاهم وحصل خير وردي اشتغلي وسوي طاف للموضوع .. بعد أنصدمت كل حد يالس يسكر الباب بويهي وحسيت ما عندي كرامه ف هالمكان خلاص حزتها ضجت ضاعت عني ١٠ سنين وانا ابني نفسي في هالمكان وحمد صار له ٤ سنين يدمر في نفسيتي وشغلي وسمعتي .. حتى الناس اللي كانوا يالسين حولنا وسمعوا الصراخ كانوا خايفين يعترفون .. كلهم جذبوا وقالو ما سمعنا شي..
بعد نص ساعه وصلني ايميل من عمر يقول بنفتح فيج تحقيق عليج اخطاء وايد وعليج ملاحظات من مديرج اشرف ولازم نتخذ اجراء فيج .. هذي كانت الحلقه الاخيره .. يعني تتبلون عليه شهور وقله احترام وعدم تطبيق للقانون و احين تفتحون فيني تحقيق .. كلمت عمر سالته ليش التحقيق يتبطل احين باقي شهر وتخلص السنه المفروض تقيموني على شغلي اخر السنه ليش فجاه اليوم بعد ما اشرف سوى اللي سواه فيني من قله احترام ؟؟ ليش اشرف ما كان يعلمني او يرشدني كونه مديري او ينبهني على الشغل من سنين ؟ هل الموضوع كيدي لاني كلمت حارب و الموارد البشري؟
طبعا ما حصلت رد .. جان انقهر على نفسي و قدمت اسقالتي ف السيستم وحطيت الرساله الخطيه ف يد عمر .. والكل انصدم .. حمد قال اذا ما سحبتي استقالتج بنكمل تحقيق فيج .. قلت له حقق انا طالعه طالعه ..
انا شفت ان ماشي فايده ايلس ف مكان تعرضت فيه لكل هالاهانات والظلم .. الفلوس ما تعوض الانسان عن كرامته.. ويلست شهرين اشتغل اجباري لان اللي يستقيل لازم يكمل "فتره الاشعار" .. خلال الشهرين سوو التحقيق بهدلوني مع الموارد البشريه لان اشرف كان يوثق ضدي ايميلات يتبلى فيها عليه من شهور .. الموارد البشريه رفضوا يعطوني فرصه اشرح اي شي ..
رفعت بلاغ عن اللي صار معاي ف اداره الأخلاقيات ethics.. ربيعتي تشتغل ف هاك القسم خبرتني انهم سكروا البلاغ بدون حل لان حمد عطاهم ريبورت التحقيق اني موظفه غير كفؤ ومحد طاع يشهد انه سمع الصراخ هاك اليوم .. الشركه اللي استثمرت فيها ١٠ سنين من حياتي طلعت منها خسرانه كل شي ..
يتني حاله اكتئاب من اللي صار.. يلست شهرين ف البيت اصيح من القهر .. وكنت ومازلت كل يوم ادعي واتحسب على حمد وعلى كل من ظلمني ف هاك المكان .. حسبي الله ونعم الوكيل على كل ظالم ..
الحمدلله ربي وفقني وحصلت وظيفه ثانيه ف مكان مريح والشغل مريح والناس طيبين ومديري الحالي طيب وما يخصه ف حد ..
اسمحولي قصتي كانت طويله واحس فيها وايد تفاصيل .. في اشيا ما كتبتها عشان ما اطول السالفه عليكم .. شاركوني رايكم ..