r/SaudiPets • u/UnheldFlame • 10h ago
قطوي يسوّي حمّامه بكل مكان إلّا اللتر-بوكس!
صباح الخير،
عندي قطو ذكر حصّلته نونو بالشارع ومخيّط بأكثر من جزء ويحتاج رعاية، الحمد لله عالجته وتبنّيته مع باقي قطاوتي وصار له أكثر من شهر عندي، والحين عمره تقريبًا ٣~٤ شهور -مع أنّي أحسّه أصغر-.
مشكلته يسوّي حمّامه (بول أو بُراز -أعزّكم الله-) أكثر شيء في غرفتي، وصدته سوّاها في غرفة والديني، غرفة أختي، على أي قطعة ملابس ولا قماش وإلخ… والله ما أمزح لو أقول إنه سوّاها ١٠ مرّات على القليل، وأنا كل شوي ما غير أنظّف وأغسّل وراه😣
جبت اللتر-بوكس عند باب غرفتي (دامه يستهدفها كثير) وصرت أقفل الباب كل ما طلعت عشان ما يدخل ويسوّيها، هو خفّف على غرفتي (طبيعي دامني أقفل الباب)، لكن قفطته سوّاها على ملابس أبوي…
ما أقول لكم ما يسوّيها في حمّامه، بلى يسوّي ويعرف، لكن الله يصلحه يسوّيها بغرفتي أكثر من حمّامه. وحطّيت له اثنين لتر-بوكس؛ واحد عند باب غرفتي، وواحد عند قطوي الثاني، واحد بحجمه وواحد أكبر منه، وأنظّفهم وكل شيء زين ومؤهّل لقضاء حاجته فيهم، بس باقي ما يتوب ويعطيني هديّة أكتشفها بمكانٍ ما، ومب عارفة وش مشكلته بالضبط.
عِلمًا إنّي مربية ٣ قطاوة غيره وكلهم يسمعون الكلام ويشوفهم وهم يسوّون حمّامهم، بس هذا جنّني مادري متى يلتزم…
قلت ممكن مشكلة عضوية/صحّية فيه؟ بس ودّيته يتعالج وما فيه مشاكل، بس عنده كم شعرة بشنبه مقطوعة (مادري وش صار له، بس يوم أنقذناه كان شنبه مقطوع ولليوم مقطوع) وافترضت ممكن تكون المشكلة حسّية بسبب شنباته؟ أو هو عبيط كذا؟ والله مادري.
ممكن تفيدوني.